سندھ کے سیلاب متاثرین کی بحالی کا عمل شروع

کراچی: سندھ کے نگراں وزیر خزانہ، ریونیو، اور منصوبہ بندی و ترقیات محمد یونس ڈھاگہ نے سندھ سیکریٹریٹ میں صوبے میں سیلاب متاثرین کے لیے 2.1 ملین گھروں کی تعمیر کے حوالے سے ایک جائزہ اجلاس کی صدارت کی۔ ڈھاگا نے سندھ حکومت کے سیلاب متاثرین کے لیے 2.1 ملین مکانات کی تعمیر کے عزم کا اعادہ کیا۔
ان کا کہنا تھا کہ 500,000 سیلاب زدہ مکانات کی تصدیق کا عمل مکمل ہو چکا ہے اور ان کی تعمیر کے لیے فوری طور پر فنڈز جاری کرنے کی اہمیت پر زور دیتے ہوئے بقیہ تباہ شدہ مکانات کی تصدیق کے عمل کو تیز کرنے کا حکم دیا۔ بریفنگ کے دوران اس بات پر روشنی ڈالی گئی کہ ہر متاثرہ گھرانے کو 300,000 روپے ملیں گے۔ جس کی تقسیم کا عمل چھ ماہ کی مقررہ مدت کے اندر مکمل ہونا ہے۔ انہوں نے تمام مالیاتی تقسیم اور تعمیراتی سرگرمیوں میں شفافیت اور معیار کی ضرورت پر زور دیا۔
نگراں وزیر نے حکام کو ہدایت کی کہ وہ متعلقہ ڈپٹی کمشنرز کے ساتھ مل کر دستاویزات کے طریقہ کار کو تیزی سے مکمل کریں۔
ان کا مزید کہنا تھا کہ سیلاب متاثرین کو گھر فراہم کرنا سندھ حکومت کی اولین ترجیحات میں شامل ہے۔